सरपंच हत्याप्रकरणी शरद पवार घेणार देशमुख कुटुंबीयांची भेट !
संतोष देशमुख यांचे अपहरण करून खून करण्यात आला होता.

गेल्या काही दिवसांपासून राज्यभरात गाजत असलेल्या मसाजोग येथील सरपंच संतोष देशमुख अपहरण व हत्या प्रकरणाच्या तपासाला गती मिळत नसल्याने पोलिसांच्या कार्यपद्धतीवर प्रश्नचिन्ह निर्माण झाली आहे. विविध राजकीय नेत्यांनी देशमुख कुटुंबियांच्या भेटी घेतल्या आहेत.या हत्या मागील मुख्य सूत्रधाराला अटक करावे व पोलिसांनी दिरंगाई केल्यामुळे पोलिसाला देखील सहज आरोपी करावे अशी मागणी देशमुख कुटुंबीय व मसाजोग येथील नागरिकानी केली आहे. या हत्येचा तपास जलद गतीने करून आरोपींना व त्यामागील मुख्य सूत्रधाराला तात्काळ अटक करावी यासाठी राष्ट्रवादी काँग्रेस शरदचंद्र पवार पक्षाचे प्रमुख शरद मसाजोग ला येऊन देशमुख कुटुंबीयांची भेट घेणार आहेत. खासदार बजरंग सोनवणे यांनी देखील संसदेत हा मुद्दा मांडून आरोपींना व त्या मागील सूत्रधाराला अटक करावी अशी मागणी केली होती.संसदेचे हिवाळी अधिवेशन 20 डिसेंबरला संपत आहे. हे अधिवेशन संपताच दुसर्याच दिवशी शरद पवार हे बीडच्या दौर्यावर जाणार आहेत.
बीड जिल्ह्यातील मस्साजोग गावचे सरपंच संतोष पंडितराव देशमुख यांचं 9 डिसेंबर 2024 रोजी अपहरण झालं आणि त्यानंतर त्यांची निर्घृणपणे हत्या करण्यात आली होती. त्यांचा मृतदेह केज परिसरात आढळून आल्यानंतर मोठी खळबळ उडाली होती. या घटनेनं सरपंच आणि त्यांचा भाऊ धारूरहून केजच्या दिशेने जात असताना अनोळखी इसमांनी गाडी आडवी लावून सरपंचांना मारहाण केली. त्यानंतर त्यांचे अपहरण करण्यात आले. दरम्यान, या घटनेनंतर सरपंच संतोष देशमुख यांचा मृतदेह आढळून आला होता. संतोष देशमुख यांना अमानुष पद्धतीने मारहाण आणि छळ करुन मारण्यात आले होते. अंगावर मारहाणीचे वळ असलेले त्यांच्या मृतदेहाचे फोटो सोशल मीडियावर व्हायरल झाले होते. याप्रकरणात पोलिसांनी आतापर्यंत विष्णू चाटे याच्यासह चार जणांना अटक केली आहे.या प्रकरणात राष्ट्रवादी काँग्रेसचे मंत्री धनंजय मुंडे यांचे निकटवर्ती वाल्मिक कराड यांचा सहभाग होत असल्याचा आरोप होत आहे. संतोष देशमुख प्रकरणातील मुख्य आरोपी विष्णू चाटे याचे वाल्मिक कराड यांच्याशी जवळचे संबंध होते. विष्णू चाटे हा केज तालुक्यातील कवडगावचे पूर्वी सरपंच होता. तसेच तो अजित पवार यांच्या राष्ट्रवादी काँग्रेसचा केज तालुकाध्यक्ष होता. मात्र, आरोपांची राळ उठल्यानंतर विष्णू चाटे याला पदावरुन दूर करण्यात आले होते,आज सकाळी विष्णू चाटेला बीड स्थानिक गुन्हे शाखेने जालना रोड वरून ताब्यात घेतले असून त्याचीअधिक चौकशी पोलीस करत आहेत.