कोणाच्याही नादी पण माझ्या नादी लागू नको…आ.सुरेश धस
सुरेश धस यांनी दिला अमोल मिटकरी यांना इशारा.

बीडच्या मस्साजोगचे सरपंच संतोष देशमुख यांच्या हत्याकांडाच्या मुद्यावरून आता महायुतीमधील घटकपक्षांच्या नेत्यांमध्ये आरोप प्रत्यारोपाच्या फैरी झडण्यास सुरुवात झाली आहे. राष्ट्रवादी काँग्रेसचे आमदार अमोल मिटकरी यांनी यासंबंधी मंत्री धनंजय मुंडे यांना आरोपीच्या पिंजऱ्यात उभे करण्याप्रकरणी भाजप आमदार सुरेश धस यांच्यावर टीका केली. त्यानंतर धस यांनी त्यांना ‘आपल्या नादी लागल्यास लै महागात पडेल’ असा धमकीवजा इशारा दिला. आता मिटकरी यांनी त्यांच्या या धमकीला गांभिर्याने घेत पोलिसांना या प्रकरणी योग्य ती कारवाई करण्याची विनंती केली आहे.अमोल मिटकरी यांनी सुरेश धस यांच्यावर धनंजय मुंडे यांचे राजकारण संपवण्याची सुपारी घेतल्याचा आरोप केला आहे. त्यांच्या या आरोपामुळे संतापलेल्या धस यांनी त्यांना आपल्या नादी न लागल्याचा इशारा दिला आहे. ‘अमोल मिटकरी फार लहान आहे. माझी त्याला एकदा विनंती आहे की, अमोल तू कोणाच्याही नादी लाग, पण या रगेलाच्या नादी लागू नको. तुला लै महागात पडेन. मी एकदा आता त्याचे ऐकून घेतो. वडीलकीच्या नात्याने त्याला समज देतो तुझी कोणाकडेही दुकान चालव माझ्याकडे दुकान चालू नको असा इशारा आमदार सुरेश धस यांनी अमोल मिटकरी यांना दिला.