सिनेस्टाईल पाठलाग करत बीडचे दोन दरोडेखोर पोलिसांनी पकडले.

बीड दि. २५ (प्रतिनिधी):- सोलापूर जिल्हयातल्या मोहोळ तालुक्यात दरोडे,वाटमारी, लूटमार करणारे कुख्यात दरोडेखोर बीड जिल्ह्यात असल्याची माहिती सोलापूरच्या गुन्हा अन्वेशन विभागाला मिळाली होती. त्यांचा पाठलाग करत मंगळवारी सकाळी सोलापूर एलसीबी पथक हे केजपर्यंत आले तेव्हा दरोडेखोरांची गाडी नेकनूरच्या दिशेने निघाली असता सोलापूर पोलीसांनी नेकनूर पोलीसांशी संपर्क करून नेकनूरच्या नुरानी चौकात नाकाबंदी करत दोघांना ताब्यात घेतले. पोलिसांनी या कारवाईत अविनाश पडूळे, बाबू अहेर (रा. स्वराज्य नगर बीड) या दोघांना ताब्यात घेतले आहे. दरम्यान ही कारवाई लूटमारीची झाली असली तरी सदरील प्रकरण हे गुटख्याशी संबंधित असल्याची चर्चा आहे.

सोलापूर जिल्ह्यातल्या मोहोळ तालुक्यामध्ये दरोडा, वाटमारी, चोरी, लुटमार करणारे दरोडेखोर बीडच्या दिशेने गाडी क्र.एम.एच २२ ए.एम. ३४४६ ने सोलापूर पोलीसांना हुलकावनी देत निघाले होते. मात्र सोलापूर एलसीबीचे एक पथक त्यांच्या मागावर सुरवातीपासून होते. दिनांक २५ रोजी सकाळी या दरोडेखोरांची गाडी केज येथे आली त्यांच्या पाठीमागे सोलापूर पोलीस होतीच.दरोडेखोर नेकनूरच्या दिशेने निघाले तेव्हा सोलापुर पोलासांनी नेकनूर पोलीसांशी संपर्क साधून दरोडेखोरांची माहिती दिली. त्यावेळी नुरानी चौकात पोलीसांनी नाकाबंदी करत तिनही दिशेला जाणाऱ्या रस्त्यावर कुठे वाहने आडवी ठेवली, तर कुठे अन्य अडथळे निर्माण केले. त्यावेळी भरधाव वेगात दरोडेखोरांची गाडी आली, त्यांनी समोर नाकाबंदी आणि अडथळे पाहीले. त्याच वेळी दबा धरुन बसलेल्या नेकनूर पोलिसांनी त्यांच्या मुसक्या बांधल्या. सदरची कारवाई आज सकाळी १० वाजण्याच्या सुमारास नेकनूरच्या मुख्य रस्त्यावर केली गेली. ही कारवाई होतांना मोठ्या संख्येने नागरिकांनी गर्दी केली होती. त्यांना आवरतांना पोलीसांच्या नाकी नऊ आले होते. मात्र नेकनूर पोलीसांनी तो जमाव आवरत दरोडेखोरांचा पाठलाग करत मुसक्या आवळल्या.सदरचे कर्तव्य नेकनूर पोलीस ठाण्याचे सहाय्यक पोलीस निरीक्षक चंद्रकांत गोसावी, पोलीस नाईक सचीन वंजारे, पोलीस अमलदार बाळासाहेब ढाकणे, सय्यद अब्दुला, सहाय्यक उपनिरीक्षक रेखा मॅडम, पो.कॉ. आशा चौरे, होमगार्ड, मुतजीब आतार यांनी केली. नंतर पकडलेल्या दरोडेखोरांना सोलापूर पोलीसांच्या ताब्यात देण्यात आले.