बीड जिल्ह्यात कायदा व सुव्यवस्थेवर परिणाम होत असल्याचे लक्षात घेऊन, सामाजिक सलोखा कायम राखण्यासाठी पोलिस दलाने मोठा निर्णय घेतला आहे. यापुढे सर्व पोलिसांनी एकमेकांना आडनावाऐवजी केवळ नावानेच संबोधायचे आहे. यामुळे जातीयता आणि सामाजिक दरी दूर करण्यास मदत होईल, असा विश्वास व्यक्त करण्यात आला आहे.
पोलिस अधीक्षक नवनीत कॉवत यांचे स्पष्टीकरण:
पोलिस अधीक्षक नवनीत कॉवत यांनी सांगितले की, “आम्ही पोलिस आहोत, आम्हाला कुठलीही जात किंवा धर्म नाही. आम्ही केवळ देशसेवेसाठी काम करतो आणि प्रत्येक नागरिकाला समान न्याय मिळवून देण्याचे आमचे ध्येय आहे.”
आडनावामुळे होणारा भेदभाव थांबवण्याचा प्रयत्न
अनेकदा आडनावाच्या उच्चारावरून जात ओळखली जाते आणि त्यावरून संवादाची पद्धत बदलते. त्यामुळे आता संपूर्ण पोलिस दलात नावानेच हाक मारण्याची प्रथा सुरू करण्यात आली आहे. एवढेच नव्हे, तर कार्यालयीन परिपत्रके आणि पत्रव्यवहार देखील आडनावाशिवाय, फक्त नावानेच निघतील.
छातीवरील नावाच्या पट्ट्यात बदल
या निर्णयाचा अंमलबजावणीचा भाग म्हणून, पोलिस अधीक्षकांपासून ते कॉन्स्टेबलपर्यंत सर्वांच्या छातीवरील आणि टेबलांवरील नेमप्लेटमधून आडनाव काढण्यात आले आहे.
समाजात सकारात्मक संदेश
या निर्णयामुळे पोलिस दल अधिक पारदर्शक आणि सर्वसमावेशक होईल, तसेच समाजात एकात्मतेचा संदेश जाईल, अशी अपेक्षा व्यक्त करण्यात येत आहे. बीड पोलिस दलाने घेतलेला हा निर्णय इतर जिल्ह्यांसाठीही प्रेरणादायी ठरू शकतो.
